امریکی ڈالر سب پر بھاری
امریکی ڈالر تمام کرنسیوں کا سب سے طاقتور اور چالاک پہلوان ہے- ابھی تک کوئی نہیں پچھاڑ پایا- ویسے تو کینیڈا، آسٹریلیا اور مصر کے اپنے ڈالر ہیں لیکن امریکی ڈالر کی خوشبو کے سامنے سب ہیچ ہیں –
ڈالر کی کہانی دنیا کی سب سے مقبول اور موثر کہانی ہے- اس کہانی کو انسان رنگ و نسل، لسانیت، مذھبی تفریق سے اونچا ہو کر سمجھتا ھے- دنیا میں جہاں کہیں کوئی مسئلہ ہو، امریکہ ڈالر کی ویلیں کروا کر میلہ لوٹ لیتا ہے- مسئلہ تو ادھر ہی رہتا ہے امریکہ میلہ لوٹ کر نکل لیتا ہے- اب آپ سے کیا چھپا ہے، افغانستان، ایراق، شام کو ہی دیکھ لیں-
۲۰۱۸ میں امریکہ میں پٹس برگ سے براستہ میری لینڈ جب وا شنگٹن کے یونین اسٹیشن پہنچے تو موبائل فون کی ضرورت محسوس ہوئی- میرے پاس امریکی سم نہیں تھی- فورا خیال آیا ڈالر تو ہیں، سم نہیں تو کہا ہوا- جیب سے دس ڈالر کا نوٹ نکالا اور قریب ہی کھڑے ایک مقامی سے ایک فون کال کرنے کے لئے مدد مانگی – وہ دس ڈالر کو بہت اچھی طرح پہچانتا تھا- ڈالر کے معجزاتی اثرات سے، موبائل اور سم نہ ہونے کے باوجود فورا کال ہو گئی – بعد میں علم ہوا کہ اس طرح کی بارگین خلاف قانون ہے-
قاہرہ ، کی بے ھنگم ٹریفک اور شور میں سفر کرنا بہت مشکل ھے-مقامی لوگوں کی انگلش سے بالکل بھی شناسائی نہیں اور ہمیں عربی نہیں آتی -جب بھی کسی سے راستہ پوچھا یا کوئی معلومات لینے کی کوشش کی ،جواب میں انکار میں ہلتی مُنڈی ہی ملی -ٹیکسی والے کو یا دوکاندار کو ہاتھ میں مصر کا ڈالر پکڑ کر کچھ بھی مانگا فورا مل گیا- یہی حال فرانس میں تھا –
” یورو” سب کو فورا سمجھ آتا تھا- سعودی عرب میں صرف ریال کو انسان سمجھتے ہیں، باقی ان کے لئے صرف حاجی ہیں-