پاکستان سمیت دنیا بھر میں فیس بک، واٹس ایپ اور انسٹاگرام کی سروسز میں خلل

پاکستان سمیت دنیا بھر میں فیس بک، واٹس ایپ اور انسٹاگرام کی سروسز میں خلل آیا ہے، جس کی وجہ سے صارفین کو پریشانی کا سامنا کرنا پڑ رہا ہے۔

یہ تینوں سروسز فیس بک کی ملکیت ہیں اور ویب یا سمارٹ فونز پر ان ایپلیکیشنز تک رسائی حاصل نہیں ہو رہی۔

ویب سائٹ ڈاؤن ڈیٹیکٹر نے، جو ایسی بندشوں کا سراغ لگاتی ہے، واٹس ایپ کے لیے تقریباً 80 ہزار اور فیس بک کے لیے 50 ہزار سے زیادہ رپورٹس کو لاگ کیا ہے۔

ڈاؤن ڈیٹیکٹر کے اعدادوشمار کے مطابق یہ بندش پوری دنیا میں فیس بک سروسز کے صارفین کو متاثر کر رہی ہے۔

فیس بک نے کہا ہے کہ ’ہم اس بارے میں آگاہ ہیں کہ کچھ لوگوں کو ہماری ایپس تک رسائی میں مسئلے کا سامنا کرنا پڑ رہا۔ ہم جلد از جلد چیزوں کو معمول پر لانے کے لیے کام کر رہے ہیں اور اس تکلیف کے لیے معذرت خواہ ہیں۔‘

تاہم فیس بک نے اس مسئلے کی کوئی وجہ بیان نہیں کی۔

آن لائن نیٹ ورک کے ماہرین نے خیال ظاہر کیا ہے کہ اس خلل کی وجہ فیس بک سائٹس کے ڈی این ایس ( DNS) میں خرابی ہو سکتی ہے۔

واضح رہے کہ اس سال کے شروع میں ڈی این ایس ( DNS) کے ساتھ ہونے والے مسائل کی وجہ سے کئی بڑی سائٹس بڑے پیمانے پر متاثر ہوئی تھیں۔