اٹلی کے شہر پورٹوفینو میں ٹریفک کو بحال رکھنےکیلئے انوکھا قانون نافذ

راولپنڈی (نیوز ڈیسک )اٹلی کے شہر پورٹوفینو میں ٹریفک کو بحال رکھنےکے لیے ایک انوکھا قانون نافذ کردیا گیا ہے۔اس نئے اور انوکھے قانون کے نفاذ کے بعد سیلفی کے شوقین افراد کے لیے اٹلی کا شہر پورٹفینو شاید سیرو تفریح کے لیے بہترین جگہ نہ رہے۔اٹیلین رویرا کے شہر میں نافذ یہ نیا قانون سیاحوں کو چھٹیاں مناتے ہوئے سیلفیاں لینے سے روکتا ہے۔برطانوی نشریاتی ادارے کی رپورٹ کے مطابق، اٹلی کے سب سے زیادہ رنگین شہروں میں سے ایک پورٹوفینو نے سیاحوں کو خوبصورت مشہور مقامات پر دیر تک ٹھہرنے سے روکنے کے لیے’نو ویٹنگ‘زونز متعارف کروائے ہیں۔اس کے علاوہ، نئے قانون کے تحت شہر کے خوبصورت مقامات پر سیلفیاں لینے پر سیاحوں کو 275 یورو یعنی 86 ہزار سے زائد پاکستانی روپے تک کا جرمانہ ہو سکتا ہے۔رپورٹ میں یہ بھی بتایا گیا ہے کہ نئے قوانین اس لیے نافذ کیے گئے ہیں کیونکہ یہ علاقے انتہائی مصروف ہوگئے ہیں اور چھٹیوں کے موسم میں بہت سے سیاح ان مقامات پر بڑی تعداد میں جمع ہوتے ہیں۔پورٹوفینو کے میئر، میٹیو ویاکوا نے دعویٰ کیا کہ سیاح مصروف علاقوں میں تصاویر لینے کے لیے روکتے ہیں تو ٹریفک جام ہو جاتا ہے اور نتیجتاََ افراتفری پھیل جاتی ہے۔ اس صورتحال پر قابو پانے کے لیے یہ نیا قانون نافذ کیا گیا ہے۔نئے قانون کے تحت سیاحوں پرصبح ساڑھے10 بجے سے شام 6 بجے کے درمیان پابندیاں لگائی گئی ہیں اور ان پابندیوں کا اطلاق دو دلکش مقامات پر ہوتا ہے جوکہ انسٹاگرام پر مشہور ہو چکے ہیں۔اس قانون پر ایسٹر کےبعد سے عملدرآمد شروع ہوا جب یہ خوبصورت شہر سیاحوں سے کھچا کھچ بھرا ہوا تھا جوکہ اب رواں سال اکتوبر تک برقرار رہے گا۔یہاں یہ بات قابلِ ذکر ہے کہ یہ پہلا سیاحتی یا مشہور مقام نہیں ہے جہاں سیلفیز لینے پر پابندی لگائی گئی ہے اس سے قبل امریکا، فرانس اور برطانیہ سمیت دنیا کے کچھ اور مشہور اور خوبصورت مقامات پر بھی ایسے ہی کچھ انوکھے قوانین نافذ ہیں۔