جوڑیاں

دنیا جوڑوں سے بنی ہے لیکن جوڑے میں بھی چوھدارہٹ ایک ہی کی چلتی ہے- امریکہ اور روس کی جوڑی میں امریکہ بڑا چوھدری تھا- اب چین اور امریکہ کی جوڑی بننے جا رھی ہے- چین شاید قابو نہ آئے- لیکن امریکہ بہت سے ساتھی بھگتا چکا ہے- چکن قورمے اور مٹن قورمے کی جوڑی میں مٹن قورمے کی حکمرانی ہے- بریانی اور چکن پلاؤ کا ساتھ بھی خوب سجتا ہے- میرے لئے فیصلہ کرنا مشکل ہے کہ ان میں راجہ کون ہے-بھنڈی گوشت اور کریلے گوشت کا بھی جواب نہیں-آلو قیمہ اور مٹر قیمہ- گاجر کا حلوہ یا گلاب جامن- اور سب سے بڑھ کر شوھر اور بیوی کی جوڑی – اس جوڑی کا فیصلہ تاریخ کر چکی ہے- شوھر دنیا پر حکمرانی کرے گا اور بیوی شوہر پر-
پاکستانی سیاست میں نون لیگ اور پی پی پی کی جوڑی مشہور تھی- پھر پی ٹی آئی نے نون سے آ متھا لگایا- اب نون بھاری ہو گئی ھے- نون کے ساتھ کس کی جوڑی بنے گی اس کے لئے انتظار کریں-
ناشتے کے لئے بن اور رس کی جوڑی عالمی سطح پر مانی جاتی ہے- بن اور رس کا مچ مارنے کے لئے انہیں چائے کا ٹچ ضروری ہے- لیکن بن کا مسئلہ یہ ہے کہ یہ چائے ساری پی جاتا ہے- اور ہمارا مسئلہ یہ ہے کہ ہم بسکٹ اور بند کو جب تک چائے میں ڈبکی نہ لگوائیں، ہمیں سکون نہیں ملتا-وقت کے ساتھ بن کا مزاج خراب ہوا ہے- فاسٹ فوڈ نے اسے بہت سر چڑھا رکھا ہے – اب یہ چائے میں کم اور برگروں میں زیادہ نظر آتا ہے- اب تو موصوف
‏” crosscent” بھی کہلوانے لگے ہیں – رس کی عاجزی اسے لے ڈوبی ہے-
بن اور رس کے بعد انڈے اور پراٹھے نے بر صغیر پاک و ہند میں ناشتے کی روایت کو جو دوام بخشا ہے وہ کسی اور ڈش کے حصے میں نہیں آیا- یہ سکہ بند ناشتہ آٹھ گھنٹے کی گارنٹی کے ساتھ شام تک ساتھ دیتا ہے-
انگریز ابھی انڈے پراٹھے تک نہیں پہنچ پایا- ان کی پہنچ ، بن اور رس تک ہی ہے –
بن اور رس کی جوڑی عین اسی طرح ہے جیسے کسی زمانے میں پاکستانی کرکٹ ٹیم میں صادق محمد اور ماجد جہانگیر، وقار یونس اور وسیم اکرم ، سعید انور اور عامر سہیل کی جوڑی ہوا کرتی تھی -سینما میں سلطان راھی اور انجمن کی جوڑی نے وہ وہ ہٹ فلمیں دی کہ پروڈیوسر بھی پریشان ہو گئے- پاکستان کے معاشرتی زوال میں اس جوڑی کی فلموں اور فلمسازوں کا ذکر نہ کرنا زیادتی ہو گی-
مہدی حسن اور ملکہ آواز نور جہاں کی جوڑی نے سُر کی دنیا کو چار چاند لگائے-
جوڑیاں ، مقابلے کو تقویت بخشتی ہیں اور مقابلہ دراصل زندگی ھے- مایوس نہ ہوں
۰-۰-۰-