یوکرائن کا روس کے زیر کنٹرول علاقے ڈونیسٹک میں میزائل حملہ 20شہری ہلاک
کیف(آئی این پی)یوکرائن کے روس کے زیر کنٹرول علاقے ڈونیٹسک میں میزائل حملے میں 20 شہری ہلاک ہوگئے۔ روس نے بھی یوکرائن کی دفاعی صنعت کی کمپنیوں کو نشانہ بنانے کا اعلان کردیا۔ روسی وزارت دفاع نے کہا ہے کہ یوکرائن نے ٹوچکایو بیلسٹک میزائل سے حملہ کیا، ڈونیٹسک میں میزائل حملے کا جواب دیں گے۔ دوسری جانب یوکرینی حکام نے الزام مسترد کرتے ہوئے کہا ڈونیٹسک میں گرنے والا میزائل روس کا ہے۔روس نے یوکرین کے ٹی وی ٹاور پر میزائل داغ دیئے، 9 افراد ہلاک اور 10 زخمی ہوگئے۔ گورنر وٹالی کوول کے مطابق لیو یو ملبے کے نیچے اب بھی لوگ دبے ہوئے ہیں۔ دوسری جانب کیف میں رہائشی عمارت پر میزائل حملے سے 2 افراد ہلاک اور 3 زخمی ہوگئے۔ترجمان پینٹا گون کے مطابق روس یوکرین پر 900 سے زائد میزائل داغ چکا ہے، یوکرین میں روس کی پیش قدمی تعطل کا شکار ہے، یوکرینی حکام کے مطابق ماریوپل کو روسی افواج نے گھیر رکھا ہے، انخلا کا عمل متاثر ہوا ہے۔ادھر اقوا م متحدہ نے یوکرین کیلئے مزید چار کروڑ ڈالر امداد کا اعلان کردیا۔ سیکرٹری جنرل انتونیو گتیریس کہتے ہیں امدادی رقم خوراک، پانی ادویات اور نقد امداد کے لیے استعمال ہو گی۔