شاہ چارلس کی تقریب تاجپوشی میں پوتا لوئس جمائیاں لیتا رہا

راولپنڈی (نیوز ڈیسک )پرنس اور پرنسز آف ویلز کے سب سے چھوٹے بیٹے شہزادہ لوئس جب بھی شاہی خاندان کی کسی تقریب میں شریک ہوتے ہیں تو میڈیا کی خصوصی توجہ کا مرکز لازمی بنتے ہیں۔شہزادہ لوئس نے ہر شاہی تقریب کی طرح تاجپوشی کی تقریب میں بھی اپنے شاہی خاندان کے اصولوں کے خلاف اپنے منفرد انداز اور شرارتوں کی وجہ سے میڈیا کی توجہ اپنی جانب مبذول کرلی۔اُنہوں نے خاص پروٹوکول اور آدابِ زندگی میں بندھے ہوئے برطانوی شاہی خاندان کے مداحوں کو خوش کردیا۔دو گھنٹے کی چرچ سروس شروع ہونے کا طویل انتظار بیشتر کے صبر کا امتحان تھا اور اسی لیے شاہ چارلس سوم کی تاجپوشی کے موقع پر 5 سالہ شہزادہ لوئس ویسٹ منسٹر ایبے میں داخل ہونے سے پہلے ہی جمائیاں لیتے ہوئے نظر آئے۔شہزادہ لوئس ویسٹ منسٹر ایبے میں تقریب کے دوران بھی مسلسل جمائیاں لیتے ہوئے اور بیزار نظر آئے۔ننھے شہزادے کے اس انداز پر سوشل میڈیا صارفین نے دلچسپ میمز بھی بنا ڈالیں۔شہزادہ لوئس ہفتے کی پوری مذہبی تقریب میں اپنے اہل خانہ کے ساتھ نظر نہیں آئے اور اس سے قبل اُنہوں نے آنجہانی ملکہ کی آخری رسومات میں بھی شرکت نہیں کی تھی۔اس کی وجہ غالباً یہی ہے کہ 5 سال کی عمر کے بچے کے لیے طویل وقت تک جاری رہنے والی تقریب میں موجود رہنا مشکل ہوتا ہے۔اس کے علاوہ، جب پورا برطانوی شاہی خاندان بالکونی میں ایک ساتھ نظر آیا تو شہزادہ لوئس کا برطانوی عوام کے لیے ہاتھ ہلانے کا انداز بھی یقینی طور پر معیاری شاہی خاندان کے معیاری اصولوں کےخلاف لیکن کافی دلچسپ تھا۔واضح رہے کہ شہزادہ لوئس اپنے بڑے بھائی اور بہن کے بعد تخت کے چوتھے نمبر پر وارث ہیں۔