سوشل میڈیا کے استعمال سے پہلے والدین کی اجازت لازمی قرار دینے پر غور

راولپنڈی ( نیوز ڈیسک ) امریکا میں جلد ہی ایسا قانون متعارف کرائے جانے پر غور کیا جارہا ہے جس کے تحت 18 سال سے کم عمر بچے اپنے والدین کی اجازت کے بغیر سوشل میڈیا کا استعمال نہیں کرسکیں گے۔امریکی نشریاتی ادارے سی این این کے مطابق امریکی ریاست ارکنساس اور یوٹاہ کے گورنر نے حالیہ دنوں سوشل میڈیا کے استعمال سے متعلق ایک بل پر دستخط کیے ہیں۔ اس بِل کے مطابق سوشل میڈیا کمپنیاں ایک ایسا قانون متعارف کروانے پر غور کر رہی ہیں جس کے تحت کسی بھی پلیٹ فارم پر لاگ اِن ہونے سے پہلے عمر کی تصدیق کرنا لازمی ہوگی۔اسی کے ساتھ ساتھ 18 سال سے کم عمر بچوں کو ٹک ٹاک، انسٹاگرام یا دیگر سوشل میڈیا ایپس استعمال کرنے کیلئے اپنے والدین یا سرپرست سے اجازت لینا بھی لازمی قرار دی جائے گی۔ امریکی قانون ساز سوشل میڈیا ایپس کے حوالے سے ضابطے اور قوانین بنانے پر غور کر رہے ہیں۔سی این این کے مطابق گزشتہ کئی برسوں سے امریکی قانون ساز، سوشل میڈیا پلیٹ فارمز سے متعلق خدشات کو دور کرنے کیلئے نئی پالیسیوں کا مطالبہ کر رہے ہیں۔ ایس پالیسیز متعارف کرانے سے نوجوان صارفین کو آن لائن ہراسانی جیسے واقعات سے بچایا جاسکے گا۔ارکنساس اور یوٹاہ کے علاوہ امریکا کی دیگر ریاستوں میں بھی اس حوالے سے قانون سازی کیلئے کام جاری ہے۔ اس اقدام کا مقصد نو عمر بچوں کا تحفظ کرنا ہے جس سے کئی والدین برسوں تک سوشل میڈیا کے بچوں پر منفی اثرات کے حوالے سے فکر مند تھے۔