بلوچستان کے عوام کی سلامتی اور تحفظ کے لیے ہر ممکن کوشش کی جائے گی،عاصم منیر

آرمی چیف جنرل سید عاصم منیر نے کہا ہے کہ بلوچستان کے عوام کی سلامتی اور تحفظ کے لیے ہر ممکن کوشش کی جائے گی۔پاک فوج کے شعبہ تعلقات عامہ (آئی ایس پی آر) کے مطابق آرمی چیف بلوچستان کے دو روزہ دورے پر موجود ہیں۔دورے کے دوران آرمی چیف کوئٹہ اور تربت گئے۔آرمی چیف کا کوئٹہ پہنچنے پر کور کمانڈر لیفٹیننٹ جنرل آصف غفور نے استقبال کیا۔ آرمی چیف کو جنوبی بلوچستان میں سیکیورٹی صورتحال اوراقدامات پر بریفنگ دی گئی۔آئی ایس پی آر کے مطابق آرمی چیف نے کور ہیڈ کوارٹرزکوئٹہ کا دورہ کیا اور یادگار شہدا پر پھول چڑھائے اور فاتحہ خوانی کی۔ انہیں آپریشنل، ٹریننگ اور فارمیشن کے دیگر معاملات پر بریفنگ دی گئی۔آرمی چیف نے کمانڈ اینڈ اسٹاف کالج کوئٹہ اور اسکول آف انفنٹری کا بھی دورہ کیا اور جوانوں ، افسران اور انسٹرکٹرز سے بات چیت کی۔آئی ایس پی آر کے مطابق آرمی چیف نے کہا کہ امن اور خوشحالی کے ذریعے ترقی کیلئے سازگار ماحول کو یقینی بنایا جا سکے گا۔